2015-04-13
Azərbaycan Respublikası Xarici İşlər Nazirliyi və Baş Prokurorluğun Mətbuat xidmətlərinin məlumatı

Slovakiya vətəndaşı Frantişek Mikloşkonun (František Mikloško) Ermənistanın  Azərbaycan  Respublikasının işğal etdiyi ərazilərində yaratdığı qanunsuz rejimi beynəlxalq səviyyədə tanıtdırmaq və təbliğ etmək məqsədilə  qabaqcadan əlbir olan bir qrup şəxslə bu ərazilərə xarici ölkə vətəndaşlarının səfərlərini təşkil etməsi, eyni zamanda Azərbaycanın ərazi bütövlüyü və suverenliyini şübhə altına alan qərəzli hərəkətlər etməsində şübhələr üçün kifayət qədər əsaslar olduğundan həmin faktlarla bağlı Baş Prokurorluğun Ağır cinayətlərə dair işlər üzrə istintaq idarəsində Azərbaycan Respublikası Cinayət Məcəlləsinin 281.2 (bir qrup şəxs tərəfindən Azərbaycan Respublikasının ərazi bütövlüyünün parçalanmasına yönələn açıq çağırışlar etmə) və 318.2-ci (qabaqcadan əlbir olan bir qrup şəxs tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanmışdır.

Müəyyən edilmişdir ki, F.Mikloşko Azərbaycan Respublikasının müvafiq dövlət qurumları ilə razılaşdırmadan icazəsiz Azərbaycanın Ermənistan tərəfindən işğal olunmuş ərazilərinə dəfələrlə qanunsuz səfər etmiş, həmin ərazilərdə keçirilən qondarma seçkilərdə “müşahidəçi” kimi iştirak etmiş və etnik və dini zəmində millətlərarası nifaqı qızışdıran hərəkətlər etmişdir. Bu şəxs qanunsuz rejimin beynəlxalq səviyyədə təbliğ edilməsi məqsədilə Yerevan şəhərində keçirdiyi mətbuat konfransında “qondarma parlament seçkiləri müstəqillik haqqında özünəməxsus referendumdur” deyə Azərbaycan Respublikasının ərazi bütövlüyünün parçalanmasına yönələn açıq çağırışlar etmişdir. O, həmçinin qondarma rejim barəsində “müstəqil dövlət kimi qəbul olunmalıdır”, “bizim üçün müstəqil dövlətdir” kimi müraciətlərlə çıxış etmişdir.

İttiham üçün əsas verən kifayət qədər sübutlar toplandığından F.Mikloşko Cinayət Məcəlləsinin 281.2 və 318.2-ci maddələri ilə təqsirləndirilən şəxs qismində cəlb olunaraq barəsində Nəsimi rayon məhkəməsinin qərarı ilə həbs qətimkan tədbiri seçilməklə axtarış elan olunmuşdur.

Təqsirləndirilən şəxs F.Mikloşkonun tutulub istintaqa cəlb edilməsi üçün zəruri əməliyyat-axtarış tədbirlərinin yerinə yetirilməsi məqsədilə axtarış qərarının icrası Daxili İşlər Nazirliyinin Baş Cinayət Axtarış İdarəsi və “İnterpol”un Milli Mərkəzi Bürosuna həvalə edilmişdir.

Azərbaycan Respublikasının cinayət-prosessual qanunvericiliyinin tələblərinə uyğun olaraq, barəsində cinayət təqibi aparılan şəxsin vətəndaşı olduğu Slovakiya Respublikasına bu barədə diplomatik kanallarla məlumat verilmişdir.

Hazırda iş üzrə zəruri istintaq tədbirləri davam etdirilir.
növbəti xəbər əvvəlki xəbər