2017-02-21
Azərbaycan Respublikası 20-ci Avropa Polis Konqresində iştirak edir

21 fevral 2017-ci ildə Berlin şəhərində 20-ci Avropa Polis Konqresinin açılışı olub.

Daxili təhlükəsizlik məsələlərində Avropanın aparıcı konfransı hesab olunan  Avropa Polis Konqresinin bu ilki mövzusu “Sərhədsiz Avropa? Azadlıq, mobillik və təhlükəsizlik”dir.

İki gün davam edəcək konfrans çərçivəsində keçirilən panellərdə terrorçuluq, mütəşəkkil cinayətkarlıq, sərhəd təhlükəsizliyi, kriminalistika, polisin uğurlu fəaliyyəti üçün rəqəmsal platformalar, ictimai yerlərin müşahidəsi kimi məsələlər müzakirə olunacaq. 

Hər il keçirilən konfransa müxtəlif ölkələrin daxili işlər nazirləri, Avropa İttifaqının nümayəndələri, polis və sərhəd təhlükəsizliyi qurumlarının rəhbərləri, təhlükəsizlik sahəsində fəaliyyət göstərən özəl şirkətlərin nümayəndələri qatılırlar.

20-ci Avropa Polis Konqresinin Almaniya Federativ Respublikasının Daxili işlər naziri Tomas de Mezyer və Avropa İttifaqının miqrasiya, daxili işlər və vətəndaşlıq məsələləri üzrə komissarı Dimitris Avramopulos tərəfindən edilmiş açılış mərasimində Azərbaycan Respublikasının Daxili işlər naziri Ramil Usubov və Azərbaycan Respublikasının Almaniya Federativ Respublikasındakı fövqəladə və səlahiyyətli səfiri Ramin Həsənov iştirak ediblər. 

növbəti xəbər əvvəlki xəbər