2018-02-16

Xarici işlər naziri Elmar Məmmədyarov Münhen təhlükəsizlik konfransı çərçivəsində Avropa İttifaqının komissarı Yohannes Han ilə görüşüb

Görüş zamanı Avropa İttifaqı ilə Azərbaycan arasında siyasi, iqtisadi, ticarət, nəqliyyat, enerji, humanitar və digər sahələrdə əməkdaşlıq məsələləri müzakirə olundu.

Elmar Məmmədyarov Azərbaycan Respublikası Prezidenti İlham Əliyevin 2017-ci ilin fevral ayında Brüsselə səfərini xatırladaraq bu səfərin Azərbaycan və Avropa Ittifaqı (Aİ) arasındakı əməkdaşlığın inkişaf etdirilməsi baxımdan xüsusi əhəmiyyət daşıdığını bildirdi. Nazir Azərbaycanın Avropa İttifaqının Şərq Tərəfdaşlığı Sammitində bütün tərəfdaş dövlətlərin, o cümlədən Azərbaycanın vahid prinsiplər əsasında beynəlxalq səviyyədə tanınmış sərhədləri daxilində ərazi bütövlüyü və suverenliyinə ifadə olunan dəstəyin təqdir olunduğunu dedi. Elmar Məmmədyarov həmsöhbətə bu ilin 11 aprel tarixində konstitusiyaya uyğun olaraq ölkəmizdə növbədənkənar prezident seçkilərinin keçiriləcəyi barədə məlumat verdi.

Görüşdə Azərbaycan və Avropa İttifaqı arasında tərəfdaşlığa dair Saziş layihəsi üzrə aparılan danışıqlara toxunuldu.

Tərəflər enerji sahəsində əməkdaşlıq məsələlərinə dair fikir mübadiləsi apardılar və Bakıda 15 fevralda Cənub Qaz Dəhlizi Məşvərət Şurasının IV nazirlər iclasının uğurla keçdiyini vurğuladılar. Uzlaşma (connectivity) və nəqliyyat sahəsində əməkdaşlıq çərçivəsində Bakı-Tbilisi-Qars dəmir-yolu və Şərq-Qərb nəqliyyat dəhlizinin əhəmiyyəti vurğulandı. Enerji məsələləri ilə bərabər təhlükəsizlik və nəqliyyat sahələrində də Aİ ilə Azərbaycan arasında dialoq mexanizminin yaradılması müsbət addım kimi qiymətləndirildi.

Nazir Elmar Məmmədyarov həmsöhbətə Ermənistan-Azərbaycan Dağlıq Qarabağ münaqişəsinin həlli üzrə cari danışıqlar barədə məlumata verərək işğala əsaslanan mövcud status-kvonun dəyişdirilməsi və münaqişənin siyasi həllində irəliləyişə nail olmaq üçün BMT Təhlükəsizlik Şurasının müvafiq qətnamələrinin tələblərinə uyğun olaraq Ermənistan qoşunlarının Azərbaycanın işğal olunmuş ərazilərindən çıxarılmalı olduğunu diqqətə çatdırdı.

Görüşdə qarşılıqlı maraq doğuran regional məsələlər ətrafında fikir mübadiləsi aparıldı.

 

http://mfa.gov.az/news/909/5489

Arxiv üzrə axtarış