2020-06-12
Pandemiya dövründə sərnişindaşımalarla bağlı AZAL-ın yeni qaydaları açıqlanıb

Pandemiya dövründə sərnişin daşımaları ilə bağlı “Azərbaycan Hava Yolları” QSC-nin (AZAL) yeni qaydaları açıqlanıb.

Bu barədə iyunun 11-də Azərbaycan Respublikası Nazirlər Kabineti yanında Operativ Qərargahda keçirilən brifinqdə AZAL-ın vitse-prezidenti Eldar Hacıyev məlumat verib.

O bildirib ki, Azərbaycanda koronavirus infeksiyası COVID-19 pandemiyası dövründə yerinə yetiriləcək sərnişin daşımaları ilə bağlı yeni qaydalar hazırlanıb. Bu qaydalara əsasən, Heydər Əliyev Beynəlxalq Aeroportundan yola düşən sərnişinlər üçün bir sıra tədbirlər tətbiq edilir. Qaydalara əsasən, yalnız yola düşməyə hazırlaşan sərnişinlərin aerovağzal kompleksinin binasına daxil olmalarına icazə verilir, terminal binasına daxil olmazdan əvvəl sərnişinlər xüsusi avadanlıq - dezinfeksiyaedici dəhliz vasitəsilə ümumi dezinfeksiya prosedurundan keçirlər, aerovağzal kompleksinin daxilində sərnişinlər tibbi maskalardan istifadə etməlidirlər. Tibbi maskaları olmayan sərnişinlərə hava limanı əməkdaşları tərəfindən maskalar təqdim ediləcək. Girişdə bütün sərnişinlərin bədən hərarəti ölçüləcək, 37,50 C-dən yuxarı hərarəti olan sərnişinlər reysə buraxılmayacaq. Aviasiya təhlükəsizliyi əməkdaşları tərəfindən yoxlama proseduru sosial məsafəyə riayət olunmaqla həyata keçiriləcək. Bunun üçün terminalda xüsusi işarələr mövcuddur.

E.Hacıyevin sözlərinə görə, qeydiyyat üçün növbələrə hava limanının xüsusi təyin edilmiş əməkdaşları tərəfindən nəzarət olunacaq. Qeydiyyat prosedurunu, həmçinin müstəqil qeydiyyat köşklərində də keçmək mümkündür (“Azərbaycan Hava Yolları” və “Buta Airways” aviaşirkətlərinin reysləri üçün). Bu zaman baqajı “Bag Drop” masasında təhvil vermək olar. Növbədə gözləməmək məqsədilə aviaşirkət qeydiyyat prosedurunu saytda onlayn rejimdə və ya mobil tətbiq vasitəsilə keçməyi tövsiyə edir. Sərnişinlərin baqajı qəbul edildikdən sonra dezinfeksiya olunacaq və üzərinə təsdiqləyici işarə vurulacaq. Uçuş zonasında (gömrük və sərhəd nəzarətindən keçdikdən sonra) “Duty Free” mağazaları və restoranlar Nazirlər Kabineti yanında Operativ Qərargahın təlimat və göstərişlərinə riayət etməklə fəaliyyət göstərəcək. Sərnişinlərin hava gəmisinə daxil olması salondakı sonuncu sıralardan başlayaraq həyata keçiriləcək.

Hava gəmisi salonunda görüləcək tədbirləri qeyd edən AZAL-ın nümayəndəsi bildirib ki, sərnişinlər hava gəmisinə daxil olarkən ekipaj onlara tibbi maska, birdəfəlik istifadə üçün əlcəklər, həmçinin dezinfeksiyaedici heldən (sanitayzer) ibarət fərdi qoruyucu vasitələr dəsti təqdim edəcək. Tualet kabinələrindən istifadə istisna olmaqla, uçuş müddətində salonda gəzməyə icazə verilməyəcək. Ekipajla təmasın minimuma endirilməsi üçün uçuş zamanı sərnişinlərə hermetik qablaşdırmada qida və birdəfəlik istifadə üçün yemək ləvazimatları təqdim ediləcək. Biznes və VIP sinif sərnişinlərinə hermetik bağlamada yerləşdirilən 4 növ qidanın təsvir olunduğu menyu kartı təqdim olunacaq. Pandemiya dövründə sərnişinlərə birdəfəlik istifadə olunan qulaqcıqlar istisna olmaqla, yastıq, ədyal, planşet və digər ləvazimatlar verilməyəcək. Uçuş zamanı sərnişinlərdən birində COVID-19 xəstəliyinin əlamətləri müəyyən edildiyi zaman, o, digər sərnişinlərlə təmasın minimuma endirilməsi məqsədilə hava gəmisi salonunun arxa hissəsində təcrid ediləcək. Ona xidmət göstərmək üçün ayrıca təyyarə bələdçisi təyin olunacaq.

E.Hacıyev Heydər Əliyev Beynəlxalq Aeroportuna uçub gələn sərnişinlərə münasibətdə görülən tədbirlər barədə də məlumat verib. “Uçuşdan sonra bütün sərnişinlər hava limanı əməkdaşlarının təlimatlarına əməl etməlidirlər, onlar növbəli qaydada bədən hərarətinin ölçülməsi və xüsusi testlərdən keçmək üçün yönləndiriləcəklər. Xəstəlik əlamətləri olan sərnişin aşkar edildiyi halda həmin sərnişin tibbi heyət tərəfindən xüsusi avtomaşın vasitəsilə müvafiq tibb müəssisəsinə çatdırılacaq. Bu halda sərhəd xidmətinin əməkdaşı çağırılaraq mobil avadanlıq vasitəsilə sərhəd nəzarəti həyata keçiriləcək. Test nəticələri mənfi olan sərnişinlər sosial məsafəni təmin etmək üçün xüsusi döşəmə işarələrinə riayət etməklə sərhəd nəzarətinə yaxınlaşacaqlar. Uçuşdan sonra sərnişinlərin baqajı dezinfeksiya olunacaq və üzərinə bunu təsdiq edən xüsusi stiker vurulacaq. Sərnişinləri qarşılayan şəxslər Heydər Əliyev Beynəlxalq Aeroportunun aerovağzal kompleksindən kənarda gözləyə bilərlər”.

Qaydaların əyani nümayişi üçün “Azərbaycan Hava Yolları” tərəfindən hava limanında və hava gəmisində yuxarıda qeyd olunan prosedurlardan keçmə ardıcıllığını əks etdirən videoçarx hazırlanıb.

Qeyd edilib ki, profilaktik işlər çərçivəsində Heydər Əliyev Beynəlxalq Aeroportunun bütün terminallarında və hava gəmilərində mütəmadi olaraq dezinfeksiya işləri aparılır. Hava limanı ərazisində istifadə edilmiş maskaların və digər fərdi qoruyucu vasitələrin atılması üçün kifayət qədər qapalı tullantı qutusu mövcuddur. Reyslərdə qida təminatı əməkdaşlar tərəfindən bütün sanitar normalara riayət etməklə həyata keçirilir, bütün birdəfəlik istifadə qabları utilizasiya olunur. “Azərbaycan Hava Yolları” və “Buta Airways” aviaşirkətlərinin hava gəmiləri salonlarında hava HEPA-filtrləri mütəmadi surətdə dəyişdirilir.

AZAL Operativ Qərargahın, eləcə də Ümumdünya Səhiyyə Təşkilatının COVID-19 ilə mübarizə üzrə bütün tələb və tövsiyələrinə riayət olunmasına məsuliyyətlə yanaşmağı sərnişinlərə tövsiyə edir.

Aviaşirkətin və hava limanının əməkdaşları, öz növbəsində, uçuşun maksimal dərəcədə rahat və təhlükəsiz keçməsi üçün bütün səylərini səfərbər edəcəklər.

 

Mənbə: https://azertag.az/xeber/1510385

növbəti xəbər əvvəlki xəbər