Almaniyada Üzeyir Hacıbəylinin 140 illiyinə həsr edilmiş konsertlər təşkil olunub
Azərbaycanın dahi bəstəkarı Üzeyir Hacıbəylinin anadan olmasının 140 illik yubileyi Almaniyada yüksək səviyyədə qeyd edilib. Tədbirlər Azərbaycanın Almaniyadakı səfirliyinin tabeliyindəki Azərbaycan Mədəniyyət Mərkəzinin dəstəyi ilə keçirilib.
Mərkəzdən AZƏRTAC-a bildiriblər ki, Bottrop şəhərindəki Müqəddəs Xaç Mədəniyyət Kilsəsində (Kulturkirche Heilig Kreuz) və Dorsten şəhərindəki Müqəddəs Məryəm Kilsəsində (Kirche St. Marien) baş tutan konsertlərdə Almaniyada yaşayan və fəaliyyət göstərən tanınmış azərbaycanlı musiqiçi Tural İsmayılovun rəhbərliyi ilə fəaliyyət göstərən “Anima Şirvani” ansamblı və Almaniyanın peşəkar “Confido Vocale” xor kollektivi çıxış ediblər.
Konsertlərdə Üzeyir Hacıbəylinin bəstələri ilə yanaşı, digər Azərbaycan və dünya bəstəkarlarının əsərləri səsləndirilib. Hər iki konsert “Leyli və Məcnun” operasından “Şəbi-hicran” parçasının ifası ilə başa çatıb.
Tədbirin əsas məqsədi Azərbaycan mədəniyyətinin zənginliyini və Üzeyir Hacıbəylinin irsini beynəlxalq auditoriyaya çatdırmaq, müxtəlif mədəniyyətləri musiqi vasitəsilə bir araya gətirmək və mədəniyyətlərarası dialoqu təşviq etmək olub.
İştirakçılar Azərbaycan musiqisinin dərinliyini və emosional təsir gücünü yüksək qiymətləndiriblər.
https://azertag.az/xeber/almaniyada_uzeyir_hacibeylinin_140_illiyine_hesr_edilmis_konsertler_teskil_olunub-3615775?fbclid=IwZXh0bgNhZW0CMTEAAR77b_8k-oqW9aGuRhbFP_VNndawWEF-YCNT6UlZJOYRurNEAYb1J_08YzlzQg_aem_UxdRcSw-Sc7r2ugSmDxymQ
