“Azərbaycanda alman izləri” kitabı nəşr olunub
Azərbaycanın Almaniyadakı Səfirliyinin təşəbbüsü və dəstəyi ilə tanınmış fotoqraf Etibar Cəfərovun “Azərbaycanda alman izləri” adlı foto-kitabı nəşr olunub.
Alman və ingilis dillərində işıq üzü görən bu unikal nəşr ölkəmizdə almanların zəngin tarixini, mədəniyyətini və töhfələrini təsirli görüntülərlə təqdim edir. Foto-kitabın hazırlanmasında alman tarixçisi professor Eva-Maria Aux da yaxından iştirak edib.
Səfir Nəsimi Ağayev kitaba yazdığı “Ön söz”də vurğulayır ki, Azərbaycanda almanların tarixən sülh və əmin-amanlıq şəraitində yaşaması mədəniyyətlərarası və dinlərarası harmoniyanın gözəl nümunəsi, ölkəmizdəki qarşılıqlı hörmət və dözümlülüyün əvəzolunmaz təzahürüdür. XIX əsrin əvvəllərində Azərbaycana köç etmiş almanlar ölkəmizin memarlıq, iqtisadiyyat, elm və mədəniyyət sahələrində dəyərli izlər qoyublar.
Səfir qeyd edir ki, 2017-ci ildə Prezident İlham Əliyevin imzaladığı sərəncamla Cənubi Qafqazda alman məskənlərinin salınmasının 200 illiyi qeyd olunub. Azərbaycanın təşəbbüsü ilə bu əlamətdar hadisə UNESCO-nun rəsmi yubileylər proqramına daxil edilərək beynəlxalq səviyyədə tanınıb.
Etibar Cəfərovun kitabı almanların Azərbaycandakı həyatını, memarlıq nümunələrini, iş adamlarının fəaliyyətini, həmçinin Azərbaycanla Almaniyanın qardaşlaşmış şəhər münasibətlərini vizual olaraq təqdim edir. Hər bir fotoşəkil bu ortaq tarixə işıq salan unikal bir hekayədir.
Bu nəşr Azərbaycan və alman xalqları arasında mövcud olan tarixi dostluq və mədəni əlaqələrin gələcək nəsillərə ötürülməsi baxımından dəyərli bir töhfədir. Kitab Səfirlik tərəfindən Almaniyanın siyasi, iqtisadi, elmi, mədəni və mətbuat dairələrində geniş şəkildə yayılacaqdır.
