Berlində 20 yanvar hadisələrinin 28-ci ildönümünə həsr olunmuş tədbir keçirilmişdir
20 yanvar 2018-ci il tarixində Berlin şəhərində Alman-Azərbaycan Ziyalılar Birliyi və Azərbaycan Evinin təşkilatçılığı, habelə Azərbaycan Respublikasının Almaniyadakı səfirliyinin dəstəyi ilə Azərbaycan xalqının tarixinə “Qara Yanvar” olaraq həkk olunmuş 20 yanvar 1990-cı il hadisələrinin 28-ci ildönümünə həsr olunmuş tədbir keçirilmişdir.
Anım tədbiri Alman-Azərbaycan Ziyalılar Birliyinın sədri Naibə Şirinova tərəfindən giriş sözü ilə açılmış və 20 yanvar şəhidlərinin xatirəsi birdəqiqəlik sükutla yad edilmişdir.
Səfir Ramin Həsənov 20 yanvar hadisələri barədə tədbir iştirakaçılarını məlumatlandırmış, 20 yanvar 1990-cı il ərəfəsində və bu tarixdən sonra cərəyan etmiş proseslərə nəzər salmış, hadisələrin kökündə Azərbaycan xalqının öz azadlığı uğurunda apardığı mübarizənin dayandığını bildirmişdir.
O, yanvar hadisələrindən öncə Azərbaycan xalqına qarşı həyata keçirilən məkrli siyasətin böyük etirazlara səbəb olduğunu, xalqın öz müstəqilliyini dinc yolla tələb etdiyini, əvəzində isə Sovet İttifaqı rəhbərliyinin əmri ilə mülki əhalinin ordu tərəfindən amansızcasına qətlə yetirildiyini qeyd etmişdir. Azərbaycan xalqının sovet ordusunun qəddarlığına şücaət və məğrurluqla cavab verərək öz müstəqilliyi uğurunda mübarizəni davam etdirdiyini və çox keçmədən müstəqilliyini bərpa etdiyini vurğulamışdır.
Ramin Həsənov həmçinin “20 yanvar” hadisələrinə hüquqi qiymət verilməsinə də toxunmuş, yalnız Ulu Öndər Heydər Əliyevin hakimiyyətə qayıdışından sonra bu məsələyə aydınlıq gətirildiyini və AR Milli Məclisinin 29 mart 1994-cü ildə qəbul etdiyi qərarla 20 yanvar hadisələrinin hərbi təcavüz və cinayət kimi səciyyələndirildiyini bildirmişdir.
Səfir Azərbaycan xalqının azadlığı uğurunda canını fəda etmiş oğul və qızlarını heç zaman unutmayacağını, onların xatirəsini hər zaman sayğı və qürurla xatırlayacağını diqqətə çatdırmışdır.
Daha sonra “20 yanvar” hadisələrinə dair film nümayiş etdirilmiş və şəhidlərin əziz xatirəsi yad edilmişdir.
Anım tədbirində Almaniyada yaşayan Azərbaycan diasporunun nümayəndələri, Almaniyada təhsil alan tələbələr, gənc tədqiqatçılar və Səfirliyin əməkdaşları iştirak etmişlər.
