Hamburq Universitetində Azərbaycanın milli musiqi alətləri ilə bağlı təqdimat keçirilib
Almaniyanın qabaqcıl ali təhsil ocaqlarından biri olan Hamburq Universitetinin müsiqişünaslıq fakultəsində təhsilini davam etdirən Bakı Musiqi Akademiyasının məzunu, sənətşünaslıq üzrə fəlsəfə doktoru Abdullayeva (Manafova) Cəmilə Azər qızı 5 iyul tarixində qeyd olunan Universitetdə maraqlı bir təqdimat ilə çıxış edib. Təqdimat izləyicilərin böyük rəğbətini qazanıb. Abdullayeva mühazirədə alman dilində çıxış edərək, Azərbaycanın milli sərvəti, xalq mədəniyyətinin mühüm daşıyıcılarından biri, özünəməxsus görüntüsü və səsi ilə seçilən qədim nəfəs alətləri olan balaban, zurna və tütəyin tarixi etimologiyası, hazırlanma üsulları, ifa texnikası və bir sıra başqa özəlliklərini professor-müəllim heyətinə, yerli və xarici ölkələrdən gələn tələbələrin nəzərinə çatdırıb.
Mühazirədə alətlərin solo və ya qrup şəklində sosial, mədəni və mənəvi tələbatlara müvafiq yaradılması, dizayn, səslənmə və texniki imkanlarına əsasən dinləyicilərin musiqi təfəkkürünün, estetik zövqlərinin formalaşdırılmasındakı rolu vurğulanıb. Onların Azərbaycan xalqı tərəfindən böyük məhəbbət qazanması qeyd edilərək, həmin alətlərin mahir ifaçıları haqqında geniş məlumatlar video və audio yazılar əsasında nümayiş etdirilib.
1977-ci ildə NASA tərəfindən kosmosa göndərilən “Voyager” kosmik uçuş aparatlarına bərkidilmiş “Qızıl Val”a dünya musiqi irsinin nümunələri olaraq Bax, Motsart və Bethovenin əsərləri ilə yanaşı, balabanda ifa edilən Azərbaycan “Şur” muğamının da əlavə edilməsi faktı iştirakçıların diqqətinə çatdırılıb.
Bundan əlavə, mühazirədə balaban, zurna və tütəyin milli bəstəkarlarımız tərəfindən bəstələnən opera, operetta, sonata, pyes, konsert və digər musiqi janrlarında istifadəsi, orkestrlərin səslənmə koloritinin milli çalarlarla zənginləşdirilməsindən də söhbət açılıb.
Maraqlı mühazirənin sonunda iştirakçılara Azərbaycanın milli şirniyatları təqdim olunub.
