Xarici işlər naziri Elmar Məmmədyarov Azərbaycanda işgüzar səfərdə olan İslam Əməkdaşlıq Təşkilatının baş katibi İyad bin Amin Mədəni ilə görüşüb
Görüş zamanı Azərbaycanla İƏT arasında əməkdaşlığın səviyyəsi, gələcək prioritet istiqamətləri, üzv dövlətlərlə ikitərəfli münasibətlər və qarşılıqlı maraq doğuran digər məsələlər ətrafında fikir mübadiləsi aparıldı.
Baş katib İyad bin Amin Mədəni müqəddəs Qurban bayramı münasibətilə Azərbaycan dövləti və xalqını təbrik etdi. O, Azərbaycanın İƏT-in üzvü kimi fəal rolunu və təşkilatın işinə verdiyi töhfələri yüksək qiymətləndirdiyini bildirdi. Baş katib Azərbaycanı multikultural ənənələr və dini dəyərlərin yüksək səviyyədə qorunduğu ölkə kimi xakarterizə edərək, ölkəmizlə əməkdaşlığın bundan sonra da yüksək səviyyədə davam edəcəyinə əminliyini ifadə etdi.
Azərbaycanın İƏT ilə əlaqələrin inkişafına xüsusi önəm verdiyini vurğulayan nazir Elmar Məmmədyarov İƏT-in üzv dövlətlərlə ikitərəfli və çoxtərəfli əməkdaşlığın daha da inkişaf etdirilməsi üçün əlverişli platforma olduğunu nəzərə çatdırdı.
Ermənistan-Azərbaycan münaqişəsinin həlli istiqamətində aparılan danışıqların son vəziyyəti barədə ətraflı məlumat verən nazir Elmar Məmmədyarov münaqişə ilə bağlı ölkəmizin haqlı və ədalətli mövqeyinin birmənalı şəkildə dəstəklənməsinə görə, İƏT Baş katibi və üzv dövlətlərə öz təşəkkürünü bildirdi. O, İslam Əməkdaşlıq Təşkilatı çərçivəsində Ermənistan Respublikasının Azərbaycan Respublikasına qarşı təcavüzünə dair Kontakt Qrupunun yaradılmasının təqdirəlayiq olduğunu qeyd edərək, Qrupun fəaliyyətinin münaqişənin həllinə öz töhfəsini verəcəyinə əminliyini ifadə etdi.
Görüşdə həmçinin tərəflər BMT Baş Assambleyasının qarşıdan gələn növbəti sessiyasında Kontakt Qrupun ilk iclasının keçiriləcəyindən məmnunluqlarını ifadə etdilər.
Baş katib 2017-ci ildə İslam Həmrəylik Oyunlarının Azərbaycanda keçirilməsi təşəbbüsünə görə ölkəmizə təşəkkürünü bildirdi.
Nazir Elmar Məmmədyarov ölkəmizin ev sahibliyi etdiyi birinci Avropa Oyunları, “Formula 1” Avropa Qrand-Prisi və digər mötəbər tədbirlər kimi İslam Həmrəylik Oyunlarının da yüksək səviyyədə təşkil olunacağını diqqətə çatdırdı.
Nazir Azərbaycanın bundan sonra da İƏT-ə fəal üzv kimi təşkilatın gündəliyində duran məsələlərin həyata keçirilməsinə öz töhfəsini verməkdə davam edəcəyini vurğuladı.
Görüşdə həmçinin təşkilat çərçivəsində İslam həmrəyliyinin gücləndirilməsinin vacibliyi qeyd olundu.
