Almaniyada Heydər Əliyevin doğum gününə həsr olunmuş gənclər konfransı keçirilib
Azərbaycan Respublikasının Almaniyadakı Səfirliyi, Azərbaycan Respublikasının Gənclər Fondunun dəstəyi və Azərbaycanlı Tələbələr və Məzunlar Platformasının (ASAP) təşkilatçılığı ilə 10 may 2024-cü il tarixində Almaniyada Ümummilli Lider Heydər Əliyevin doğum gününə həsr olunmuş gənclər konfransı keçirilib.
Tədbirdə giriş sözü ilə çıxış edən Azərbaycanın Almaniyadakı səfiri Nəsimi Ağayev bildirib ki, Ümummilli Lider Heydər Əliyev yürütdüyü uğurlu daxili və xarici siyasət ilə bütün sahələrdə dövlətimizin müstəqilliyinin möhkəmləndirilməsi və inkişafı üçün misilsiz xidmətlər göstərib. Ulu Öndərin bu xidmətləri sayəsində müstəqil, güclü və çağdaş Azərbaycanın ardıcıl inkişafı üçün möhkəm təməllər yaradılıb və bu gün ölkəmiz həmin təməllərə söykənərək Prezident İlham Əliyevin rəhbərliyi altında uğurla inkişaf edir, yeni-yeni nailiyyəylərə imza atır.
Azərbaycan Respublikası Prezidentinin Administrasiyasının Gənclər siyasəti və idman məsələləri şöbəsinin sektor müdiri Tural Məmmədov əsası Ümummilli Lider Heydər Əliyev tərəfindən qoyulan dövlət gənclər siyasəti və Ulu Öndərin gənclərə qayğısı haqqında danışıb. Vurğulanıb ki, müasir Azərbaycanın varlığı bilavasitə Heydər Əliyevin ideallarının və amalının nəticəsidir.
Azərbaycan Respublikası Gənclər Fondunun icraçı direktoru vəzifəsini icra edən Qədir Xəlilov bildirib ki, Heydər Əliyevin azərbaycançılıq ideyası ölkədə ictimai sabitliyi, milli birliyi, xalq-hakimiyyət vəhdətini təmin edib. Tətbiq etdiyi xarici siyasət prinsipləri ölkəni ən ağır zamanlarda beynəlxalq ziddiyyətlər burulğanlarından itkisiz ötüşdürə bilib.
ASAP-ın icraçı direktoru Sevda Mansurova çıxışında Ulu Öndər Heydər Əliyevin gənclərə göstərdiyi diqqət və qayğıdan danışıb. Eyni zamanda ASAP-ın Almaniyada fəaliyyəti və gələcəkdə həyata keçiriləcək layihələr barədə məlumat verib.
Tədbir zamanı gənclərlə Ulu Öndər Heydər Əliyevin çoxşaxəli fəaliyyəti, Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətləri, böyük xilaskarlıq missiyası barədə müzakirələr aparılıb.
Qeyd edək ki, Ümummilli Lider Heydər Əliyevin doğum gününə həsr olunmuş gənclər konfransı ASAP-ın Almaniyada təşkil etdiyi ilk irimiqyaslı tədbirdir.
