Ümummilli Lider Heydər Əliyevin xatirəsi Berlin şəhərində anılıb
10 may 2022-ci il tarixində Azərbaycan Respublikasının Almaniyadakı səfirliyində Ümummilli Lider Heydər Əliyevin anadan olmasının 99-cu ildönümünə həsr olunmuş tədbir keçirilib.
Tədbirin əvvəlində Ulu Öndərin səfirlikdəki büstü önünə çiçəklər qoyulub, xatirəsi bir dəqiqəlik sükutla yad edilib.
Tədbirdə giriş nitqi ilə çıxış edən Azərbaycanın Almaniyadakı səfiri Ramin Həsənov Ümummilli Lider Heydər Əliyevin Azərbaycanın milli dövlət quruculuğu və müasir inkişaf strategiyasının müəyyən edilməsi istiqamətində göstərdiyi əvəzsiz xidmətlərdən bəhs edib. O, Ulu Öndəri dövlətimizin öz tarixinin mühüm və taleyüklü mərhələsinə qədəm qoyduğu bir dövrdə ölkə daxilində və dünyada baş verən mürəkkəb proseslərin mahiyyətini dəqiq qiymətləndirməyi və bu prosesləri milli mənafelərin tələb etdiyi aydın bir istiqamətə yönəltməyi bacaran siyasi lider kimi xarakterizə edib. Səfir vurğulayıb ki, bu gün də Azərbaycan Respublikasının Prezidenti, Ali Baş Komandan İlham Əliyev tərəfindən uğurla davam etdirilən həmin inkişaf strategiyası müasir dövrdə dövlətimizin milli mənafelərinin effektiv şəkildə müdafiə edilməsinə tam şəkildə imkan yaradır. Məhz sözügedən uzaqgörən siyasət nəticədə 30 ilə yaxın işğal altında olan torpaqlarımız azad edilərək ölkəmizin ərazi bütövlüyü bərpa olunub. Ramin Həsənov, ömrünü Vətəninin inkişafına və çiçəklənməsinə həsr etməklə Azərbaycan xalqının ümumilli lideri adını qazanmış dünya miqyaslı siyasətçi - ulu öndər Heydər Əliyevin xalqımızın qəlbində əbədi olaraq qalacağını vurğulayıb.
Tədbir çərçivəsində Ümummilli Lider Heydər Əliyevin anadan olmasının 99-cu ildönümünə həsr olunmuş konsert baş tutub. Konsertdə Almaniyada yaşayan azərbaycanlı musiqiçilər - Nərmin Nəcəfli (piano), Fəridə Rüstəmova (skripka), Nəriman Əkbərov (violonçel) və Güllü Muradovanın (vokal) ifasında Qara Qarayev, Fikrət Əmirov, Səid Rüstəmov, Vaqif Mustafazadə, Tofiq Quliyev və digər azərbaycanlı, habelə dünya bəstəkarlarının əsərləri səsləndirilib.
Tədbirdə Almaniya Xarici İşlər Nazirliyinin, Almaniyada akkreditə olunmuş diplomatik korpusun, elmi-siyasi dairələrin nümayəndələri və Almaniyadakı Azərbaycan diasporunun təmsilçiləri iştirak ediblər.
