Qara Yanvar şəhidlərinin xatirəsi Berlində ehtiramla yad edilib
20 Yanvar faciəsinin 35-ci ildönümü ilə əlaqədar Azərbaycanın Almaniyadakı səfirliyində anım tədbiri təşkil olunub.
Anım tədbiri faciə qurbanlarının əziz xatirəsinin bir dəqiqəlik sükutla yad edilməsi ilə başlayıb. Sonra faciə ilə bağlı Səfirliyin alman dilində hazırladığı film nümayiş etdirilib.
Azərbaycanın Almaniyadakı səfirliyinin müşaviri Cavid Nəsirli tədbirdə çıxış edərək, 20 Yanvarın Azərbaycanın müstəqillik mübarizəsində dönüş nöqtəsi olduğunu qeyd edib.
1987-ci ildən başlayaraq Ermənistanda azərbaycanlılara qarşı qırğınların törədildiyini bildirən diplomat, 300 mindən çox azərbaycanlının öz tarixi torpaqlarından didərgin salındığını vurğulayıb. Bildirib ki, bu qırğınlar və Azərbaycana qarşı irəli sürülmüş ərazi iddiaları haqlı olaraq xalqımızın hiddətinə və Azərbaycanda milli azadlıq hərəkatının daha da vüsət almasına səbəb olmuşdu. Nəticədə, milli azadlıq hərəkatının yatırılması məqsədilə Mixail Qorbaçovun əmrilə Sovet qoşunları tərəfindən Bakıda Qara Yanvar faciəsi törədilib. Azərbaycan xalqının Ümummilli Lideri Heydər Əliyevin Moskvada bu faciənin tördilməsini sərt şəkildə pislədiyi qeyd edilib. Qanlı Yanvar faciəsinin Azərbaycan xalqının əzmini qıra bilmədiyi, əksinə onun azadlıq uğrunda mübarizəsini daha da alovlandırdırdığı və 1991-ci ilin oktyabr ayında Azərbaycanın öz dövlət müstəqilliyini yenidən bərpa etdiyi qeyd edilib.
Tədbir Berlində fəaliyyət göstərən azərbaycanlı pianoçu Nərmin Nəcəflinin ifası ilə davam edib.
Anım tədbiri çərçivəsində faciə ilə bağlı fotosərgi təşkil olunub.
Sonda 20 Yanvar şəhidlərinin xatirəsinə ehsan verilib.
